بەشی حەفتەمی خەوننامەی کوردی؛ بەشی ئەلف؛ ئازاری ئەندامەکان:

ئیبن سیرین دەڵێ: ئەگەر کەسێک لە خەودا دیتی کە هەموو ئەندامەکانی لەشی ئازاریان هەبوو، واتە ئەو ماڵ و سامانەی کە هەیەتی، لە دەستی دەچێت.

ئەگەر سەری دێشا واتە گوناە و تاوانی زۆر ئەنجام دەدات و پێویستە داوای لێخۆشبوون لە خودای گەورە بکات و خێر و سەدەقە بدات.

ئەگەر نێو چاوانی دێشا، نیشانەی خراپی بیروباوەڕە ئایینەکەیەتی و خەم و مەینەتییە.

ئەگەر چاوی دێشا و کەسێک چارەسەری بۆ دەکرد، نیشانەی دۆزینەوەی ڕێگای ڕاستی دین و ئیمانە.

ئەگەر گوێیەکانی دێشا، واتە قسەی ناشرین و سووکایەتی لە هەموو کەسێکەوە دەبیستێت.

ئەگەر زمانی ئازاری هەبوو، یان کەموکورتی لە زمانیدا هەبوو، واتە قسەیەک دەکات کە بە هۆیەوە تووشی دەردەسەری دەبێت و ئۆپاڵی دەکەوێتە ئەستۆ.

ئەگەر بازرگانێک ئەم خەوەی بینی، ئەوا لە بازرگانیدا درۆ دەکات.

ئەگەر بینی زمانی خۆی بڕیوە، نیشانەی چاکی و لە خواترسی ئەو کەسەیە.

ئەگەر مەڵاشووی (ئاسمانەی دەم)ی دێشا، واتە مافی کەسێک بە ناڕەوا دەخوات.

ئەگەر دەمی دێشا، واتە خەم و خەفەتی زۆر دەخوات.

ئەگەر ملی ئازاری هەبوو، واتە ئەمانەتێکی لە ئەستۆدایە و ئەمانەتەکەی نەداوەتەوە.

ئەگەر دڵی ئازاری هەبوو واتە توند و بێ بەزەییە.

ئەگەر زگی دێشا، پارە و پارووی حەرام دەخوات.

ئەگەر پشتی دێشا، خزم و کەسەکانی دەیڕەنجێنن و ئازاری دەدەن، وە ئەگەر جگەری دێشا، واتە خۆشەویستی و بەزەیی، بۆ منداڵەکانی هەیە.

ئەگەر دەستی ئازاری دا، واتە زوڵم و ستەم لە هاوسێ و درواسێ و براکانی دەکات.

ئەگەر باسکی دێشا، واتە زوڵم لە خزمەکانی دەکات.

ئەگەر بینی پەنجەکانی دێشا واتە خزمەکانی خۆی دەڕەنجێنێ و ئەوانیش ئەو خەمبار دەکەن.

ئەگەر ئەندامی زاوزێی یان قنی (قوونی) دێشا، واتە دەکەوێتە نێو گەندەڵی و خراپەکاریەوە.

ئەگەر سمت و ڕانی دێشا، زوڵم لە کەسوکاری دەکات.

ئەگەر لاقی دێشا، واتە بەزەیی بە ژێر دەستەکانیدا نایتەوە و ئازاریان دەدات.

ئەگەر بینی لەشی داخ دەکەن، پارە و سەروەت و سامانی دەست دەکەوێت.

چ کاردانەوەیەکت هەیە، بەرانبەر، ئەم پۆستە؟👇